Sal Lumen and Spiritus Mundi Philosophici

Mais tout ainsi que cette terre premiere demeura coagulee par le feu avec ses excremens & feces; ce sel qui est vrayement terre retient aussi les feces, encore qu'il semble pur & net, plein de blancheur & lucidité: Car rien ne se peut engendrer, alimenter, & croistre, sans engendrer aussi des excremens, de la formation & separation desquels je reserve à parler en leur lieu. Or ce sel ou cette terre aride qui se coagule & assiet dedans l'eau, reboit tout son humide, & le desseiche par la continuation du feu: gardant neantmoins en elle une humeur interne qui ne l'abandonne point; & de laquelle luy provient cette vertu dissolutive: puis arrivant temperature, entre le sec & l'humide, elle demeure apte aux productions des choses, tiree de puissance à effect par l'action de la chaleur. Et de vray tout ainsi que le corps de la grand terre a cette vertu productive & specifique des individus; aussi l'a celle cy que nous appellons sel: Non pas qu'elle produise herbes, metaux, ny animaux, comme fait l'autre, mais elle a dans son sein la semence originelle de toutes choses: de sorte que l'experience nous y fait voir par les operations du feu, les couleurs, saveurs, accroissemens, vegetations, & endurcissemens, que l'on voit en chacun de ces trois genres. Et non seulement cela, mais encore le propre feu que le Soleil y a mis; par lequel il vivifie & nourrit toutes choses. Ainsi qu'il m'est apparu au progrez de certaine œuvre philosophique: Ayant veu en cette matiere seule, distinctement & l'une apres l'autre: selon l'ordre & les intervalles determinez par les maistres, toutes les couleurs & les apparences qu'ils disent devoir arriver en leur matiere à la confection de leur pierre: avec cette fusion soudaine apres estre parvenu à la haute rougeur du pavot champestre: Et toutesfois sans avoir produict le miracle tant desiré & attendu, quant à la Methamorphose des metaux: mais ayant faict sur les corps humains par sueurs universelles & naturelles, des effects si miraculeux que je ne l'oserois publier sans craindre le tiltre de charlatan: toutesfois, Monseigneur, vostre Altesse me peut garentir de cette injure, comme tesmoing irreprochable; puisque le bruict de ces merveilles estant parvenu jusqu'à elle vous daignastes bien ainsi que Jupiter visiter la demeure de vostre pauvre Philemon; portee du genereux dessein d'en estre asseuree par la bouche d'un homme de bien, qui cruellement affligé de diverses douleurs, & trop extenué de la languissante longueur de ses maux, n'avoit plus recours qu'à la bonté celeste, ny espoir qu'en la mort, à chacun moment reclamee. Le dire veritable duquel obligea encore vostre altesse, de faire ouyr par information solennelle une multitude d'autres que j'avois soulagez par ce mesme remede. Et si l'avidité ou l'envie de celuy auquel estoit commis & confié le soin de la santé de feu (de tres-illustre & glorieuse memoire) Monseigneur le Reverendissime Cardinal vostre trescher frere, ne l'eust empesché d'en prendre, j'estime que Dieu n'eust desnié à son Excellence la mesme grace & benediction qu'il avoit eslargie à tant de pauvres gens.