Sal Lumen and Spiritus Mundi Philosophici

La terre donc, comme receptacle des influences & vertus superieures, a dedans soy la fontaine de cette ame vitale, du surgeon de laquelle decoule aux animaux, Mineraux & vegetaux le benefice de la vie, qui leur depart sentiment, essence, & vegetation, selon qu'elle trouve la matiere obeyssante, & disposee à mouvement. De là vient que les animaux composez d'une masse plus ductible & facile à mouvoir, sentent, & vegetent; & pour cette cause engendrent aysément leurs semblables, comme pourveuz de vie sensitive & vegetative. Mais les plantes, & toutes choses germinantes, de qui l'Esprit n'est point arresté par l'assemblement d'une matiere du tout crasse & dure, croissent & s'augmentent, pourveus de la seule vie vegetative: & vont engendrant leurs semblables par semence ou traduction: Mais non en la façon des animaux. Les Mineraux n'ont point la faculté sensitive ny vegetative, & vivent seulement d'une vie essentielle; d'autant que leur composition est plus dure que celle des animaux, & vegetaux; & leur matiere plus crasse & grossiere, qui gesne & reserre par trop cet esprit qui les vivifie, & par ce moyen sont empeschez de pouvoir produire leur semblable, si premierement repurgez de leur grossiere impurité, ils ne sont resoluts en la subtilité de leur premiere matiere. Voyons ce qu'en dit Augurel, excellent Philosophe & Poëte Latin,