Sal Lumen and Spiritus Mundi Philosophici

Mais comme Dieu constitua le Cherubin ardant avec le glaive enflamé pour garder l’arbre de vie, aussi Nature a estably ce dragon veillant & jette-feu pour empescher l’entree du jardin où elle a planté l’arbre precieux portant les pommes dorees: c’est à dire la congnoissance des plus occultes secrets de son tresor: que les doctes anciens ne vouloient nullement escrire, ains seulement enseigner de bouche à ceux qu’ils en cognoissoient dignes. Qui a esté la cause que ces grandes & admirables sciences se sont esvanouies, & par laps de temps ont esté tenuës des ignorants pour contes faits à plaisir. Ce qu’Esdras prevoyant devoir avenir par les bannissemens, tueries, fuittes, & captivitez de la gent Israelite, & craignant que tels arcanes perissent, parce que sans le benefice de l’escriture la memoire des hommes ne pouvoit estre grandement durable, il assembla tous les sages qui restoient jusques au nombre de septante, lesquels reduirent ces choses avec luy en autant de livres, comme il se tesmoigne quand il dit: apres quarante jours le Seigneur parla, disant: les choses que tu as premierement escrites propose les publiquement afin que tous les lisent: mais les derniers septante livres, tu les conserveras afin de les bailler aux sages de ton peuple, car en iceux est contenuë la veuë, l’intelligence & la source: Et je le fis ainsi.