Sal Lumen and Spiritus Mundi Philosophici

Ces Taureaux monstrueux qu’il faut assujettir & accoupler au joug, sont les fourneaux où se doivent faire les operations; lesquels representent naïvement la teste d’un Taureau, & jettent le feu par les yeux & la gorge ainsi que dit la fable. Car il est necessaire qu’il y ait des souspiraux par lesquels soient reiglez les degrez de la chaleur, & le feu preservé d’estouffement, d’autant que si l’on n’est maistre du feu il arrivera beaucoup d’accidents pendant le cours de l’œuvre, qui frauderoient l’ouvrier de son attente. J’en puis parler comme expert: car de neuf vaisseaux que je mis en decoction pour trouver le vray degré de chaleur, les huict perirent; & ne me resta que celuy par le moyen duquel furent faites les experiences dont j’ay cy devant parlé. Ce dragon tousjours veillant est ce Mercure general que Cadmus sceut autresfois tuer, c’est à dire fixer. Le champ de Mars où il falloit semer les dents du serpent martial, n’est autre chose que le vaisseau dans lequel s’eslevent ces soldats armez de lances aiguës. Lequel vaisseau ne doit point estre en cet endroit un allembic de verre comme pense & dit Pollidore: Mais une forme de Cabacet ainsi que dit la fable, estroit en bas & s’eslargissant fort par le haut. Et faut qu’il soit de bonne terre bien cuicte: & non de fer ou de verre. Au fond duquel s’eslevera un camp armé & herissé de lances, qui semblent horriblement irritees, se coucher l’une contre l’autre pour combatre ainsi qu’en plain champ de bataille. Voila ce qu’a ingenieusement inventé le Poëte, pour faire admirer au vulgaire comme fort estrange & inouïe, une chose tellement familiere, que si je la nommois on se mocqueroit de luy & de moy.