Sal Lumen and Spiritus Mundi Philosophici

R'appellant donc les esprits à la clarté qui les doit conduire vers le souverain remede que Dieu a particulierement destiné pour la conservation de l'homme en le comblant des benedictions celestes, j'oseray avec toute l'humilité & sincerité requise & bienseante à ma portee & profession, non comme Theologien, mais seulement comme simple disciple des Philosophes, crayonner icy quelques naïfves conceptions, que les amateurs de verité pourront autant favoriser qu'ils les trouveront raisonnables. Je diray donc que toute intelligence que l'homme seul communique à l'homme est incertaine & confuse; pource qu'en luy logent ordinairement ignorance & irresolution. Mais celle qu'il reçoit de la lumiere universelle est tres-claire, & tres-fermement appuyee sur un fondement inebranlable. Car sçavoir absolument, est cognoistre les choses par leurs causes premieres; & n'y a jamais de certitude aux secondes, jusques à ce que l'on soit parvenu à leur source. C'est pourquoy la Nature des especes ne peut estre cognüe si la cognoissance de leur genre n'a precedé. Ny les Natures des Microcosmes (dont le nombre est infiny) sans avoir premierement compris celle du grand monde qui leur a donné l'estre. L'homme aussi ne peut estre bien cognu sans la prealable cognoissance du Macrocosme, duquel il n'est que l'effigie: non plus que ce Macrocosme sans avoir apprehendé dequoy & comment il est faict. Car en qu'elle façon pourroit-on cognoistre l'homme qui n'est à son commencement qu'un peu de glaire ou musilage informe, ny comme il monte à la perfection, si l'on n'a cognu ceux qui l'ont engendré, non pas les seconds parents, qui sont le pere & la mere, Mais les premiers, assavoir le Ciel & la Terre. Et si mesme l'on n'avoit parfaite intelligence de la creation premiere de ceux cy, comment les pourroit on cognoistre? Tout ainsi que le limbe de l'homme gist en la matrice où il n'est qu'un peu de fange, qui par apres se forme sur l'exemplaire des parents; & par les mesmes progrez & façons qu'ils furent parfaicts. Ainsi le Ciel & la Terre, & tout ce qui est en iceux, c'est à dire tout ce grand monde, est comme un limbe & masse dans le cahos, dont on ne peut avoir aucune lumiere si l'on ne contemple les projects & progrez de sa distinction & formation. Venons donc à l'original afin d'en cognoistre les extraicts: & par le patron jugeons des choses imitees.