Sal Lumen and Spiritus Mundi Philosophici

Mais la nature comme pieuse mere & soigneuse conservatrice de l'œuvre de ses mains, a faict armer en leur faveur deux puissants & subtils champions pour rabattre l'orgueil de ces insolents adversaires, & les chasser hors de leur forteresse. C'est le feu pour l'un, exterminateur de cette adustion soulfreuse : & l'eau pour l'autre, qui separe & emporte cette terrestre feculence. Or comme nature est ingenieuse & subtile en toutes ses operations, aussi a elle laissé l'art doué de pareille subtilité & industrie : Car il n'y a que ces deux voyes pour parvenir aux separations ; Que la nature mesme a suivies dés le commencement du monde, duquel les premieres semences informes, vuides, & confuses, estoient dissoutes pesle-mesle dans les eaux, d'où elles furent separees par le moyen du feu de l'esprit du Seigneur estendu par dessus ; qui fut le premier agent & moteur en la separation du Cahos, dont il s'ensuivit qu'incontinent la lumiere fut separee des tenebres, les formes distinctes de la confusion, les generations de la sterilité, & la mort de la vie. Tellement que si les choses feussent demeurees confuses en leur premier desordre & meslange de l'impur avec le pur, de l'excrement avec la substance, de la Terre avec le Ciel, & de la vie avec la mort, tout seroit privé d'action, de puissance, d'essence, & de vie, restant toute la masse inutilement gisante en sa confusion. L'artiste donc estant entré en la consideration de ces choses, & voyant que rien ne peut desployer sa vertu jusques à ce que la confusion des excrements & impuritez en soit bannie, il a choisi l'eau & le feu pour ses coadjuteurs, à l'exemple de Nature, dont il a curieusement remarqué l'operation, mesme en la generation des metaux, lesquels sont d'autant plus parfaicts qu'ils ont esté mieux mondifiez & digerez dans l'estomac de la terre. Parquoy c'est un poinct qui demeure fixe & resolu, que le feu & l'eau sont les generaux & principaux moyens de separation.