Sal Lumen and Spiritus Mundi Philosophici

Car apres que le souverain auteur de toutes choses eut disposé la confusion qui estoit dedans le cahos, il feit que les choses superieures demeurerent pures & subtiles, & les inferieures ordes & grossieres: d’autant que le naturel des substances est de s’eslever vers le lieu de leur origine: & celuy des excrements de s’affaisser & rabattre vers le centre. De là vient que le pur qui est dans les animaux & vegetaux esleve & recherche le haut, les faisant eslever & croistre jusques à ce qu’il soit delivré des masses excrementeuses qui l’engluent & attachent à la corruption mortelle, & qu’il puisse atteindre le lieu où il en soit plus esloigné, afin d’y vivre sans alteration ny defaillance. De là vient que les creatures plus spirituelles & subtiles habitent les lieux hautains comme plus espurez, & vivent d’aliments convenables & pareils à leur naturelle substance. Mais celles qui sont plus corporelles habitent les bas lieux, & demeurent parmy les feces & immondices qui ont leur siege és lieux inferieurs: c’est pourquoy elles sont infectees & gastees, vivant de ce qui est embrouillé & meslé parmy les lies du monde. Car tout ce que la terre & les autres elements (qui sont les receptacles de ces impuritez) peuvent produire, est corrompu & souillé, engendrant par consequent corruption & souillure en tout ce qui en est alimenté: au moyen dequoy le sang acquiert une mauvaise disposition, qui cause la malignité des humeurs, aux uns plus, aux autres moins, selon la portee de l’inquinament des parents, & la quantité abusive de l’usage des choses corruptibles desquelles procede la cause de la destruction & mortalité. Car si la terre & ce qu’elle engendre estoient aussi remplis de pureté que le Ciel, tous les animaux vivroient de la mesme vie que vivent les hostes celestes.