Lumen de Lumine

Istam vero publicationem aut major pars calumniatur, aut contemnit, aut sine Deo promissa ejus penes nos quærit, existimans nos illos statim Docturos, quo modo Aurum Chimicum sit præparandum, aut illis afferre magnos Thesauros, quibus possint coram mundo pomposè vivere, superbire, Bella gerere, Lucra exercere, helluari, potare, incontinenter vivere, & in aliis peccatis vitam commaculare, Quæ tamen omnia contraria sunt voluntati ipsius Dei. Hi exempla capere debebant à decem virginibus illis (quarum quinque Stolidæ à prudentibus Oleum petebant) esse multum aliam rationem, dum nimirum opus sit, ut quilibet proprio labore & studio in Deo id consequatur. Nos tamen Illorum sociorum Animos ex singulari Dei gratiâ & Revelatione, etiam ex ipsorum scriptis agnoscimus, aures nostras obturamus, & quasi nubibus nos obducimus, ne Ipsorum Boatus, & Ejulatus audiamus, qui in vanum aurum clamant. Atque hinc fit etiam quod multum Calumniarum & Conviciorum contra nos effundunt, quæ non curamus, sed Deus suo tempore judicabit.