Φωτίου μαρτυρία

Προσφωνεῖ δὲ ταῦτα (ἐκλογῶν ἀποφθεγμάτων ὑποθηκῶν βιβλία τέσσαρα) δι’ ὃν καὶ τὴν συνάθροισιν φιλοπονήσαι λέγει (Ἰωάννης Στοβαῖος), Σεπτιμίῳ ἰδίῳ υἱῷ. ἡ δὲ συναγωγὴ αὐτῷ ἔκ τε ⟨φιλοσόφων καὶ⟩ ποιητῶν καὶ ῥητόρων καὶ τῶν κατὰ τὰς πολιτείας λαμπρῶς βεβιωκότων ἐγένετο ὧν, ὡς καὶ αὐτός φησι, τῶν μὲν τὰς ἐκλογὰς τῶν δὲ τὰ ἀποφθέγματα καί τινων ὑποθήκας συναλεξάμενος ἐπὶ τῷ ῥυθμίσαι καὶ βελτιῶσαι τῷ παιδὶ τὴν φύσιν ἀμαυρότερον ἔχουσαν πρὸς τὴν τῶν ἀναγνωσμάτων μνήμην στείλειεν.