The Sophic Hydrolith

Vber daß haben sie auch viel andre grosse vnnd verborgene geheimnus der Göttlichen wunderwerck, auch den grossen reichthumb seiner Glori darauß erkennet, vnnd erlernet, dardurch dann etliche Hertzen von Gott erweckt vnnd angezündet, daß sie ferners zu seinem erkantnus deducirt vnd gebracht worden sein, dann sie durch diesen Schatz kein grossen Reichthumb, weltlichen oder zeitlichen wollust vnd Pracht gesucht haben, oder damit zu erlangen begert, sondern vielmehr jhre lust vnd frewd an dem wunder in den Creaturen zusehen vnd zuerkennen gehabt haben, welche herrliche Geschöpf vnd Werck deß Allmechtigen sie dann viel anderst betrachtet vnd angesehen haben, als leyder bey der jetzigen Welt geschicht, die dann dieselbige schier nicht anders als wie die Kühe vnd Kelber anzuschawen pflegt. Auch diese edle Kunst vmb jhres geitzes, Pracht vnd vnd zeitliche Ehr vnd wollüsten willen suchet vnd zu lernen begehret, mit welchen gedancken sie aber weit gefehlet. In deme Gott solche Gaben nicht den Gottlosen vnnd verächtern seines Worts, sondern nuhr den Frommen, sich in dieser bösen Welt erbahr vnnd geruhlich in stille mit jhrem leben hinzubringen, vnnd zuerhalten, auch jhren dürfftigen nechsten brüderliche hülffreichung vnnd beförderung zuerzeigen mitgetheilet.