The Sophic Hydrolith

Auch mustu vngezweiffelt wissen, daß alle geschaffene ding, in drey Naturen getheilet sein, als Vegetabilische, Animalische vnnd Mineralische, vnd das in diesen dreyen alle ding begriffen sein, denn alle Kräuter, alles Holtz vnnd Bäume, was im Fewer verbrennet, vnd Flammen von sich gibt, wirt Vegetabilisch genant. Darnach alle Thier, die das Leben haben, oder was vnter Fleisch vnnd Blut begriffen, wirt Animalisch. Endlich alle Metallen vnd Stein, auch alle andere ding, so keine Flammen können von sich geben, sein Mineralisch, vnnd werden vnter die Mineralische Natur begriffen. Also sihestu nun, lieber Bruder, daß alle ding in drey vnderschiedliche Naturen getheilet vnd begrieffen sein. Demnach, ob sie schon in die drey vnderschiedene Naturen getheilet sein, haben sie doch alle nur einen Anfang oder Principium, davon sie gezeuget oder geboren werden, daß durch die vnterschiedene kochung verendert sich diese prima materia in dreyerley wege, darnach die kochung ist, durch diese einige vnnd gemeine Substantz vnterschiedener Naturen.