The Sophic Hydrolith

Mit solchen vnnützen vnd vnnötigen Processen haben die rechten Chymici nichts zu schaffen, sondern sie gebrauchen sich der Ehrwirdigen Natur, wie die es in den Adern der Erden nach ihrer arth, weise, zu wegen bringet ohn Solution, Coagulation, Putrefaction, welche doch in sich gantz simpel vnd schlecht ist. Dann bedencke dich doch recht, lieber Freund, was für Instrumenta als Helmen, Kolben, was für Retorten, Circulirgläser, Sublimirgläser, oder mancherley Ofen, mancherley Fewr, auch mancherley Materien man findet in den Adern der Erden, da die Metallen grunen vnd wachsen, ob die Natur auch in den Adern der Erden so viel vnd mancherley Ofen oder Gläser, auch so mancherley Materien gebrauchet, als Vitriol, Saltz, Arsenicum, Mercurium, Schweffel, vnd anderm Lumpenwerck mehr, hie vnnötig zu erzehlen, wie heut die Alchimisten gebrauchen, damit sie jhr Gelt, vnd Zeit mit grossem vnverstand zubringen, mag sie auch billich vor Vnverständige schelten, dieweil sie sich täglich in Alchymia vben, aber doch in der grossen Sudlerey mit jhren Solutionibus, Coagulationibus, Distillationibus, Putrefactio: das doch nichts werth ist, verharren, vnd das Gelde vnd die Zeit vnnützlich verzehren, dieweil die Natur so schlecht ist, vnd jhre Arbeit so gar simpel vnd schlecht verbringet. Worzu dienet vns dann die grosse Sudlerey vnnd Mühe, die doch nichts als Thorheit von den wahren Künstlern gerechnet wird?