The Sophic Hydrolith

Ich regiere durch meine Weißheit das primum mobile: meine Hände seyn die achte sphæra, wie es mein Vatter verordnet hat: meine Hämmer seyn die sieben Planeten / mit denen ich so schöne Sachen schmiede. Die Materi / darvon ich mein Werck mache / als Gesteine / Metall / Bäume / Kräuter / vernünfftige vñ vnvernünfftige Thier / vnd in gemein alle Ding / die der Himmel beschleußt / nehme ich allein von den vier Elementen. Das Chaos oder Hyle ist die erst Materi: dies ist die Herrscherin / so den König / Königin vnnd alles Hoffgesinde führet. Der Ritter ist jederzeit in seinem Dienst bereit / vnd die Kammerjungfraw thäte zu jhr anbefohlenes. Je herzlicher die forma ist / je herzlicher ich mich darinnen erzeige. Vnd wisse / daß ich macht habe / allen essentien das Wesen zu geben / sie beständig zu erhalten / vnnd in den Materien eine formam zu erwecken. Mercke ferner wol die drey Theil / darein Gott im Anfang die erste Materi getheilet: von dem ersten vnd reinesten Theil hat er geschaffen Cherubin, Seraphin, Ertzengel vnnd alle Engel: von dem andern vnd nicht so reine Theil hat er geschaffen die Himmel vnd jhren Beschluß: von dem dritten aber vnd vnreinem Theil / die Element mit jhrer Eigenschafft: vnd erstlich das Fewer / so an Tugend den andern vorgehet / so er in die Höhe vnter den Mond gesetzet. Es hat keine Corruption, sondern den reinern Theil von der quinta essentia in sich. Nach diesem hat er die subtile Lufft gemacht / vnd von der quinta essentia auch darein / nicht aber so viel als in das Fewer gesetzt: denn nach dieser hat das sichtbarliche Element deß Wassers gefolget / welches so viel von dem fünfften Wesen hat / als es dessen bedarff: vnnd vff das Wasser endlich die Erde: solches alles aber vnd die gantze Natur / die ich die erste Creatur bin / hat er in einen augenblick geschaffen. Die Erde hat er dick vnd finster / doch fruchtbar / gemacht / vñ helt sie das wenigste Theil von dem fünfften Wesen in sich. Anfänglich seyn auch die Elementa nur schlecht vnnd simplicia in jhren sphæris gestanden. Also ist die Lufft propriè vnnd eigentlich nur feucht: appropriatè aber hülfet jhr das Fewer: das Wasser ist propriè kalt / appropriatè aber feuchte / welche Feuchtigkeit es von der Lufft annimmet: die Erde ist propriè trucken / appropriatè kalt / vñ nimmet die Kälte von dem Wasser wegen jhrer grossen Truckenheit aber nahet sie zu dem Fewer. Das Fewer aber ist das fürnembste Element / gibet das Leben / vnnd durch seine Wärme verursachet es das wachsen. Nun muß ich dir auch sagen / daß kein Element ist / so nicht in das andere wircke / also daß eines wirckend / das andere leidend sey: als das Fewr wircket in die Lufft / die Lufft in das Wasser / das Wasser wircket in die Lufft vnnd Erde / wenn das Fewer die Wirckung erreget. Die Erde ist eine Mutter vnd Ernährerin aller ding. Alles was vnter den Himmel in die fäulung gehen mag / vnnd jhr die Wärme ohn vnterlaß in jhren Bauch gibt / das erfähret sie nach der Geburt. So viel macht hat mir Gott gegeben / daß ich die vier Element widerumb zurück bringe in das fünffte Wesen / welches man als dann die erste Materi nennet / so in vnsern Element genericè vermischet ist. Durch meine Kunst reducire ich / dahero generationes entstehen / vnd seyn die species oder Gestalten / so herwider gebracht werden / in der reducirten massa begriffen.