The Sophic Hydrolith

Daß daß eusserliche obiectum (wie mans zu reden pflegt) oder der Buchstabe/ welcher vmb vnserer schwachheit geschrieben/ dem jnnerlichen vnd Gott eingepflantzten vnd verliehenen gnaden Liecht/ nur für ein Zeugnuß Matth.24.Wie auch das mündlich gehörte Wort/ für ein anreitzung vnnd mittehülff/ oder befördernuß zu solchem zu achten vnd zu halten ist. Als zu einem Exempel wann dir ein weisse vnd schwartze Taffel wirt fürgelegt/ vnd würdest gefragt/ welche auß jhnen beiden für schwartz oder weiß zu halten sey. So die Erkantnus aber der zweyer vnderscheidlichen Farben nicht vor in dir were/ würdest du mit solcher dir fürgelegte Frage/ auß den blossen vnd stummen obiectis oder Taffeln jre ansehung nicht zu erörtern wissen/ Sintemal die Erkantnus nit auß den Taffeln (so stum vnd todt seind) auß sich selbst nie erkennen können/ sondern auß deinen dir angebornen vnnd täglich geübten wissenschafften herauß vnd fliesse. Die obiecta zwar/ (wie zuvor auch gedacht) mouirn die sensus/ vnnd verursachen sie zum erkennen/ daß Erkantnus aber geben sie mit nichten/ sondern muß von jnnen herauß/ auß dem erkennenden/ vnnd solcher Farben wissenschafften iudicante kommen vnd herfür gebracht werden.