The Sophic Hydrolith

Aber dennoch nit also, lieber Bruder, daß du solt verstehẽ oder in dem Argwohn bleiben, gleich wie dich die falschen Bösewichter haben gelehret, daß ☿ vnd sulphur die erste materia der Metallen seyn solte, denn man in den Adern der Erden, da die Metalle wachsen, weder ☿ noch sulphur findet, welchs sie schlecht zu einer Verführung erdichtet haben, vnd das wahre Elementische Fewer, genannt sulphur, vnnd den liquorem Mercurium. Ebenermassen haben sie das Elementische Fewer genannt vnser Solem, vnnd den liquorem vnser Lunam, damit sie die Leute verleitet haben. Auch haben sie es genennet Spiritum vnd Animam. Dem Elementischen Fewr haben sie den Namen geben Animæ, vnd den Elementischen liquorem Spiritum, darumb, daß die Elementischen Dinge vnsichtig seyn. In gleicher weise seynd also Seel vnnd Geist, denn die Seel ist ein vnsichtig Fewr, vnd der Geist ist eine vnsichtige Feuchtigkeit. Also haben sie dann das eusserliche wesentliche Fewer vnd Wasser genannt corpora, dieweil sie sichtiglich vnd greifflich seyn, darauff die Laboranten die Metallische corpora verstehen, vnnd einem dieselbe auffzulösen, welches doch falsch ist. Denn darumb haben sie es genannt corpora, daß diß augenscheinliche Wasser vnd Fewer fühlich vnd greifflich seyn, vnd das Elementische Wasser vnd Fewer geistlich vnnd vnsichtig. Darumb laß dich von den spitzsindigen Alten nicht verleiten noch verführen, denn sie seyn subtiel, so du dich dafür nicht hütest, führen sie dich in die Stricke, weisen dich auff die Metallischen corpora, vnd meinen allein die Metallische essentiam.