The Sophic Hydrolith

Weilen aber auch den lebendigen Meistern jhre Schrancken vorgeschrieben vnd Ziel gesetzt, wie weit vnnd weme sie solche geheime Kunst offenbahren sollen oder mögen, damit sie nicht verbrecher des Sigels göttliches geheimnus vnd dem Fluch aller philosophorum vnterwürffig befunden werden, ist es besser, hindan gesetzt alle Bücher vnnd menschliche Lehrmeister, die Natur allein anschauen, derselben wunderbare Wirckung, nit allein in herfürbringung der Metallen, sondern auch aller Erdgewächsen betrachten, jhr circulation in Winter vnnd Sommer, in Früling vnd Herbst, in Tag vnnd Nacht, in Hitze vnd Wärme, immerdar für Augen haben vnd derselben nachsinnen. Dann wann dir gründlich bewust, warauß vñ wie die Natur ein jedes in sein wachßung, blüte, frucht, vnd vollkommenheit bringet, wird dir auch hinfüro nicht schwerlich sein die Händt Naturgemäß anzulegen, vnnd auß der Materia welche die Natur in die Höllen der Erden zu vnderschiedenem Gewächsen gebrauchet, auch dein vorhaben ins werck zurichten, vnnd nach dem wuntsch zu vollbringen.