The Sophic Hydrolith

Dann, lieber Bruder, die Essentia ist die fürnemste Sache, da die Warheit vnnd kunst ligt. Aber dennoch sein verführte Sophistische Alchymisten so plump vnnd vnverständig, daß sie diß nicht können ersinnen noch begreiffen, sondern zumartern sich von tag zu tag, mit so viel vnnd mancherley, der Natur gar wider, Substantien, die gar nicht dienlich zu der wahren Kunst, gleich als ich Horn, Holtz oder Stein seen wolt, vnnd darab natürlich Korn zu erndten verhoffte. Das es doch vnmüglich, das man auß allerhand Substantien, die man erdencken möchte, Sonn vnnd Monde machen köndte, sondern allein aus der natürlichen Essentia der Naturen, davon alle ding ihren anfang bekommen, vnd hernach durch die vnderschiedene kochung in vnderschiedene Substantzen sich außtheilen. Also hat ein jeglich natürlich Ding in den Naturen sein sonderliche kochung. Darumb müssen wir, so fern wir anders zu der wahren Kunst der Alchymia begehren zu kommen, arbeiten, als die Natur in den Adern der Erden ihre Arbeit vollbringet.