The Sophic Hydrolith

Ich verstehe hier mit / daß in dem rohen argento vivo vnd perfectem Leib / so man die Sonne nennet / seyn vier Element / vnd ein jedes mit dem andern vnscheidenlich vereiniget / vnnd durch sonderbare Mittel vermischet / daß sie durch menschliche Kunst nit separiret werden können. Denn alle alte ware Philosophi haben geschrieben / daß das Fewer vnd die Lufft im Wasser vnd Erden eingeschlossen seyn / darinnen sie jhre Tugende erzeigen / vnd vnscheidentlich hefftig streiten: niemand dann Gott vnd jr die Natura mag dieses Band entlösen. Warhafftig mag ich solches sagen / vnnd Philosophisch erweisen / denn das Fewer ist vns vnsichtbarlich / vnnd die Lufft vnbegreifflich: vnnd wer da sagt / daß man ein jedes sonderlich sehen könne / der ist ein betrieger: Dann auß vnwidersprechlichen Gründen seyn die Elemente vnscheidentlich. Wiewol die Sophisten fürgeben vnd vergewissern wollen / daß sie das Gold vnd Quecksilber in die vier Element scheiden / so seyn sie doch Lügner. Denn so das Element Fewer vnd Lufft also gescheiden weren / müste jedes verschwinden. Sie sagen wol / daß sie solche behalten: wissen aber nicht wohin sie kommen: sintemal weder Lufft noch Fewer gesehen oder vernommen werden können. Wann sie auch schon jhrem fürgeben nach solche außgezogen haben / so machen sie doch das jenige / so sie berühren / nur naß / welches weder der Lufft vnd deß Fewers Eigenschafft ist. Ferner wie jhr Natura gesagt habt / vnd ich in Schrifte finde / so ist niemand / er sey so grosser Doctor als er wolle / der wissen könne / wie viel in einem jeden natürlichen Dinge von jedem Element billich seyn möge. Denn Gott hat es euch allein geben. Vnd ist kein Philosophus so weise / der da wüßte die Element zu componiren vnd zuvermischen / oder wie viel zu einem natürlichen Ding / es sey spiritualisch oder corporalisch / von jedem Element nothwendig were zu ordnen. Wann er nun sich vermisset / solche zu separiren, wie will er sie widerumb zusammen bringen / ein vereiniget compositum vnd wahres subiectum widerumb zu machen / demnach er die Quantitet vnd Qualitet der Elementen / auch die weise der rechten vereinigung nichts weiß? Es muß derhalben nicht voneinander gescheiden werden / wenn man es nicht weiß widerumb zusammen zu setzen. Man muß euch Natura machen lassen / die jhr die Kunst verstehet wol zu disponiren, den Stein der Philosophen zu componiren, vnnd rechte vermischung der Element ohne scheidung zu machen. Jhr habt mir gnug gesagt / daß scheidung der Element vnd jhre widerzusammenfügung nicht von nöhten ist: sintemal keine solche Kunst zu erlangen / vnnd es nur ein von Gott euch gegebenes vnd verordnetes Geheimniß ist. Ohne zweiffel aber wirdt der Stein oder Elixir allein von euch gemacht ohne scheidung der Element / jedoch nicht ohne ewer Instrument / noch ohne hülffe eines weisen vnd deß Wercks verständigen Menschen. Es sagt Aristoteles / wo der Physicus oder Naturkündiger auffhöret / da fange der Medicus an. Derhalben fängt auch die Alchimia an / wann sie der Natur vnnd jrer Scientz nachgehet. Welches ein jeder Philosophus vnd Medicus in acht nehmen soll.