The Sophic Hydrolith

Wie dann ein Philosophus warnet vnnd spricht: Mit diesem Geist soltu dich nicht einlassẽ / du habest dann zuvor gnugsamlich seine erkanung vnd wissenschafft. Dann Gott wunderbarlich in seinen Wercken / vnnd seine Weißheit hat keine zahl / welcher auch mit jhme nicht schertzen läßt / da dann solcher Exempla etliche könten erzehlet werden / wie sich mancher leichtfertiger weise solches hohen Wercks vnderfangen vnd ermassen / aber darmit angelauffen / das etliche wol eins theils todt bey solchem gar gefunden / oder sonsten durch vnglückhafftigen zustandt gefehrlich dadurch beschädiget worden seindt / sintemahl es nit so ein gering ding / wie etliche jnen trewmen lassen / vermeinen / weil die Philosophi solches einem Kinderspiel vnd Weiber arbeit verglichen / sie dasselbig auch so leicht vnd gering achten / welches aber die nit also gemeinet / sondern die nacharbeit in diesem werck / so an jhm selbst gar gering vnnd leicht / dadurch verstanden / vnd solche nur denjenigen die von Gott dazu gewürdiget / vnnd mit erkantnus desselben begabet / also schlecht vnd geringschätzig angedeutet haben. Darumb so schawe zu / daß du nicht vnbedächtlich mit solchem zu früh hierin außgehest / sondern alles dein vorhaben mit dem gebeth vnd hülff Gottes / wie im anfang erinnert / zuvor anfahest / so wirstu als dann nichts zu förchten / auch keiner gefahr dörffen gewertig seyn.