Sal Lumen and Spiritus Mundi Philosophici

Car la terre est le vray centre de l'univers, & le point de ce grand cercle où toutes les lignes de ces influctions aboutissent. Et parce que cette terre est un corps solide, & que la solidité de tous autres corps provient d'elle, il faut une vertu tres-subtile pour la penetrer par ses moindres parties. Les Cieux donc qui sont de tres-subtile matiere produisent des vertus pareilles, car les operations suivent ordinairement les qualitez du corps qui les produict. Or cette penetration ne serviroit de rien, & seroit comme une eau courante sur un champ duquel elle n'arrose que la superficie à cause de la vistesse de son cours, si elle n'y faisoit quelque pose. Mais puis qu'infailliblement elle tombe jusques au centre, & qu'elle ne peut passer outre, ne trouvant rien de plus bas pour y descendre; elle est contrainte de s'y arrester & amasser. C'est pourquoy quelques uns ont dit que le fonds de la terre est tres-precieux, à cause que toutes les vertus celestes s'y assemblent & unissent. Lesquelles ainsi unies & assemblees ont une puissance infinie, tant parce qu'elles y affluent continuellement, que parce qu'elles procedent des corps infinis en vertus, immortels, incorruptibles, & indeficients. Les anciens Poëtes qui fabuleusement nous ont laissé ce qu'ils avoient imaginé de ces choses occultes, partageant le monde en trois, assignerent à Jupiter comme premier fils de Saturne, le Ciel: encores qu'aucuns ayent voulu attribuer le droict d'aisnesse à Neptune, & l'election de ce regne superieur à Jupiter, pour certaines raisons sophistiques nullement necessaires à mon propos: auquel Neptune fut baillé la Mer pour son lot. Pluton fut apanagé de la Terre comme cadet. Et toutesfois il est estimé le plus riche des trois freres; à cause que dans son heritage naissent & renaissent continuellement tous les tresors du monde: & semble qu'il ayt rendu ses deux freres tributaires vers luy de ce qu'ils ont de plus exquis. Ils le disent Roy des enfers; & pour son lieu de plaisance luy donnent les champs Elisies, où les esleuz & bien-heureux luy vont faire la court.