Sal Lumen and Spiritus Mundi Philosophici

Qui est la raison pourquoy les choses sur lesquelles elle se faict, & ce qui en procede est de pareille nature & qualité; recevant sans cesse une force & multiplication de ces vertus qui ne manque jamais: & puisque cette influence ne s'estend point dessus les Cieux, où comme j'ay dit, il n'y a rien; il s'ensuit de necessité qu'elle se doit faire sur quelque chose inferieure & corporelle, sur quoy elle puisse agir, Car rien ne patist que ce qui a corps: Mais quel corps naturel y a il au monde que celuy de la terre? n'est-ce pas le corps des corps: Et celuy seul qui de luy mesme peut subsister, ayant toutes les qualitez requises aux corps, assavoir longueur, largeur, profondité, & superficie? n'est-ce pas le subject ou but prefix de la Nature, à quoy sans cesse elle s'exerce de corporifier & animer? Où pourroit elle donc accomplir ces ouvrages sinon dans le corps de la terre? ainsi la terre est le seul corps inferieur qui reçoit les influences celestes, les vertus & puissances desquelles sont de penetrer, eschauffer, purger, separer, vivifier, augmenter, conserver, & restaurer. Il n'est besoin de disputer icy maintenant si les Astres & les Cieux influent leurs corps sur le corps de la terre, car l'experience nous en releve par le tesmoignage des sens. Parquoy, laissant cela pour cognu, je m'efforceray seulement à desduire comment ils font leurs vertueuses influctions. J'ay n'aguere dit qu'elles tendent en bas directement & non en haut. Et d'autant que le bas d'un corps spherique est son centre, c'est donc necessairement sur la terre qu'elles decoulent, & en elle seule qu'elles finissent & fichent leurs pointes.