Sal Lumen and Spiritus Mundi Philosophici

Mais on me pourra demander comment ce grand amas & confusion d'eaux a esté divisé, en sorte que cette ample & lourde masse terrestre en soit sortie? & par quel moyen tant de choses diverses sont produictes de cette terre. Je respondray à telles questions ce que la seule experience m'en a faict voir, disant qu'il est naturellement probable qu'il se feist lors premierement quelque assiette au milieu de ces eaux par le moyen de separation, suivant le propre texte de Moyse, qui dit que Dieu separa les eaux des eaux, car il en est de deux sortes, assavoir l'eau elevative & l'eau congelative. La premiere s'eslevant par evaporation laissa donc la seconde fixe en bas: ainsi que le voyent journellement ceux qui font le Sel tant marin que fontainier. Vray est que l'un se fait par la force attractive des rayons du Soleil: & l'autre par la violence expulsive du feu. Or le feu seul, ou la seule chaleur entre toutes les choses du monde possede cette vertu separative, par l'une ou l'autre de ces deux voyes, ou naturelle, ou violente. C'est donc par l'un ou l'autre que cette separation a esté procuree. Mais à qui eust sceu Moyse comparer ce feu sinon à l'esprit divin, qui ne se peut autrement definir, que la source universelle de lumiere, de chaleur animante & de vital mouvement; par lequel toutes choses sont, & persistent en leur estre? Considerons le sel de Nature estant encore en son lymbe ou cahos; C'est à dire diffus, dissoult, ou noyé dans son eau, en quelle forme apparoistra-il à nostre veue, & quelle qualité luy attribuera nostre goust & attouchement sinon d'eau amere? Lesquelles forme & qualité, il conserveroit eternellement si le separateur n'intervenoit. Mais aussi tost que cette eau eslevative sent l'action du feu qui luy est ennemy; la separation commence à se faire par evaporation, & peu à peu se diminuant faict apparoistre au centre de son globe une petite assiette de sel qui s'assemble tout ainsi que fist le corps de la Terre dans le premier limbe des eaux universelles. Voilà donc la premiere operation que fist le feu, assavoir de faire apparoistre l'aride, c'est à dire, la terre.