Sal Lumen and Spiritus Mundi Philosophici

C'est donc de sel que tous les corps ont esté premier composez, car ainsi que j'ay dit au precedent chapitre, les principes de composition & de resolution sont semblables. Et comme veulent & tiennent tous les philosophes pour maxime infaillible, la premiere matiere des choses n'est point autre que leur derniere, c'est à dire celle en quoy ils se resolvent en leur fin, donnant pour exemple la glace & la neige qui par chaleur se reduisent en eau; de laquelle par congelation elles estoient faictes. Et si je voulois icy raporter tous les tesmoignages des bons Autheurs il en naistroit un juste volume. Or pour monstrer que ce sel est la pure & vraye terre, non pas celle sur laquelle nous marchons; que je veux prouver n'estre que l'excrement & lie de l'autre; j'auray recours à la premiere creation des choses, laquelle je figureray par l'exemple d'une operation familiere qui se faict à l'imitation de Nature, & par le moyen & mesme reigle que ce grand univers a esté faict. J'ay cy devant dit que le principe des choses estoit l'eau, ou bien une Nature humide ainsi que dit Hermes, sur laquelle, suyvant le texte de Moyse, l'esprit de Dieu estoit porté.