Sal Lumen and Spiritus Mundi Philosophici

Et comme cette nature humide desseichee a esté premierement eau, il faut aussi la reduire en eau par l'eau, qui est le seul moyen pour aquefier les choses seiches, comme le feu pour desseicher les humides: Chose que Nature observe tres-exactement en la generation des metaux. Car l'eau fluant par les pores terrestres, trouve une substance dissoluble, avec laquelle elle s'unit par leurs plus simples parties, & à cette union conviennent les elemens deuëment proportionnez. La substance adonc ainsi conjointe par la dissolution, se congele & coagule d'elle mesme par endurcissement qu'elle a naturellement en elle, à cause de sa siccité innee: puis par successive & longue decoction elle acquiert la dureté metallique. Mais puis que cette substance est dissoluble, de quelle autre nature peut elle estre que de sel? car rien ne se dissoult que les sels; desquels la multitude & varieté est grande, puis qu'il y en a autant que de choses au monde? Tellement que tant plus il est bruslé, & plus acquiert il de facilité à se dissouldre, pourveu qu'il ne soit arrivé jusques à la vitrification. Cette premiere matiere est donc un sel: C'est à dire que le sel est le premier corps, par lequel elle se rend palpable & visible, duquel sel Raymond Lulle entend parler dans son testament, quand il dit: Nous avons cy dessus declaré qu'au centre de la terre est une terre Vierge, & un vray element: & que c'est l'œuvre de Nature. Partant Nature est logee au centre de chacune chose. Ainsi le sel est cette terre Vierge qui encore n'a rien produit; en laquelle l'esprit du monde se convertit premierement, par vitrification; c'est à dire par extenuation d'humeur. C'est luy qui donne forme à toutes choses, & rien ne peut tomber au sens de la veue ny de l'attouchement que par le sel: Rien ne se coagule que le sel: Rien que le sel ne se congele: C'est luy qui donne la dureté à l'or, & à tous les metaux: au diament, & à toutes les pierres tant precieuses qu'autres, par une puissante mais tres-secrette vertu vitrifiante.