Sal Lumen and Spiritus Mundi Philosophici

Cette matiere ou principe est donc attachee au corps de la terre, où elle se nourrit, espaissit, & incorpore. Pour cette cause, ceux qui ont voulu la tirer des corps metalliques parfaicts, ou des imparfaicts & simples, par extraction de quintessence auroient bien mieux faict (puis qu'ils cherchoient le premier sperme) d'ouvrir la matrice de la mere, que de tuer & destruire les enfans desja parvenus à la perfection de leur aage, pour les cuider remettre en l'estat qu'ils estoient à leur conception: Mais quand ils ouvriroient cette matrice, qu'y trouveroient ils? car rien ne se presente delà à la veue; & plusieurs advoüant bien que cette voye estoit la plus favorable, ont encore esté deceuz, esperant trouver dans le ventre des minieres quelque apparence de commencement d'aurification: ce qu'ils n'ont faict toutesfois, & ont desesperé de leur dessein, d'autant qu'ils ne voyoient aucune moyenne disposition entre la mollesse & la dureté du metal. Puis donc que l'œil n'y void aucune chose, comment est-il possible d'y rien trouver & prendre? Cela est l'œuvre, mais cecy est le labeur. Certainement tels investigateurs ne jugeoient pas que la matiere premiere n'est autre chose qu'esprit & vapeur si subtile & delice que le seul regard de l'intellect la peut voir ou imaginer. Toutefois d'autant qu'elle est attachee au corps de cette mere, & habite en icelle, il faut par vive raison qu'elle ait quelque nature quasi corporelle, & apte à se corporifier. Or jaçoit que j'aye cy devant assez ouvertement declaré à ceux qui sont douez de subtil jugement quelle est cette Nature, si adjousteray-je icy que la spongiosité de la terre est pleine de cette vapeur spiritueuse, qui par la vertu de la chaleur innee, acquiert une qualité seiche, accompagnee d'une humeur secrette, par laquelle elle se condense & coagule en corps specifique.