Sal Lumen and Spiritus Mundi Philosophici

Lequel en son temps parvenu à la grandeur naturelle, commence (non pas proprement à mourir) mais bien à s'acheminer au declin pour retourner en sa premiere forme; & se convertir en celle de la terre, où cette vapeur ne manque point & n'est jamais oysive: Car elle engendre en la pourriture de l'arbre certains Polipodes, avec une infinité de bestions & vermines: ou bien ayant reduit le chesne en terre, elle y recommence quelqu'autre vegetation. De penser dire que la masse du gland s'augmente & multiplie, il y auroit de l'erreur: Car en la germination il se void qu'il demeure tout entier, & se separe de son germe sans diminution ny amoindrissement quelconque; & neantmoins l'arbre en est sorty. Ce n'est donc point par la multiplication & augmentation du gland que le chesne s'engendre: C'est aussi peu par addition, & distraction de la terre adjacente, car il s'espuiseroit autant de terre que l'arbre pourroit estre grand, ce qui ne se faict point. Il est donc necessaire que ce soit par quelqu'autre voye & matiere, puis que ce n'est ny par l'une ny par l'autre de celles là. Or cet esprit ou vapeur seule y estant employée, c'est cela seulement qui se corporifie & fait individu, & de là que provient la creation, augmentation, & conservation de toutes choses, non point des masses terrestres qui ne sont que les excremens de la matiere spirituelle & primeraine. Comme il se void en la digestion de l'estomac, laquelle rejette les excrements au mesme poids & quantité de viandes qu'il a prises: ayant neantmoins tiré son propre & particulier aliment, qui n'estoit autre chose que cet esprit enclos dans la masse d'icelles: lequel seul par sa siccité se corporifie, & par son humidité se dilate & augmente, poussé & conduit par sa propre chaleur.