Sal Lumen and Spiritus Mundi Philosophici

Quand je diray donc le feu estre le principe des choses, je ne m'esloigneray de la raison ny de la verité: Car sans doute il en est le premier ouvrier: & le dernier destructeur & mueur des formes qu'il avoit causees: jusques à tant qu'il ait reduit les choses à leur periode & matiere: outre laquelle il n'y a plus de progression, mais bien transformation: ainsi que je l'esclairiray tantost par la comparaison des choses visibles & familieres. La premiere puissance active qui opere en la production de l'homme est l'agitation ou motion de la chaleur: Laquelle en imitant l'action du feu, de qui le naturel est principalement de separer, tire de tout le corps ce que l'on nomme sperme, (auquel est contenue la semence humaine en puissance) qu'elle cuit & digere pour estre fait apte à l'expulsion, puis à la generation ou augmentation parfaite de l'homme entier. Laquelle generation & augmentation est tousjours aydee & conduite du feu, qui est le seul operateur: jusques à ce qu'arrivant au but de son exaltation, & trop enflamé par le soulfre des excrements procedans de l'impureté des aliments, il desseiche l'humide radical, qui est le siege & conservateur de la vie. Cela fait, ce feu mesme ne cesse point son action qu'il n'ait converty les corps en cendre par resolution & corruption, qui ne se peuvent faire que par luy seul.