Sal Lumen and Spiritus Mundi Philosophici

Mais (dira quelqu'un) puisque cette vapeur provient du feu comment est elle humide, veu que le feu est chaut & sec; & d'où luy peut donc arriver cette contraire qualité? Il n'y a rien icy d'estrange, si nous voulons considerer qu'il est impossible que le feu vive ny puisse estre sans humeur, qui est son aliment, entretien, & sujet; sans lequel le feu mesme ne sçauroit estre imaginé. Car puisque son naturel est d'agir, & que son action est indeficiente; il faut de necessité qu'il agite sur quelque chose: & que mesme cette chose ne luy manque jamais. Ainsi donc le feu & l'humidité coessentielle sont comme le masle & la femelle de toute generation; & les premiers parents de la corporification de cet Esprit du monde: comme il se verra cy apres. Mais le feu est comme le premier operant; d'autant que l'action precede tousjours la passion. Combien que ce qui patit inseparablement coexiste avec ce qui agit: Ainsi que le stoïque Zenon disoit jadis, estimant que la substance du feu, par l'air convertie en eau, & conservee en icelle, comme un sperme general, d'où puis apres toutes choses sont engendrees, estoit la premiere matiere de l'univers. Thales Millesien, que les Grecs honorent du nom de sage, s'arrestant à la matiere patiente, estimoit que c'estoit l'eau: qu'Heraclite aussi nommoit Mer: Et Moyse plus illuminé que ces deux, dit que l'Esprit de Dieu estoit porté sur les eaux avant la creation du ciel & de la terre: Nommant le feu à cause de sa noble, pure, & digne essence, l'Esprit de Dieu.