Sal Lumen and Spiritus Mundi Philosophici

J'Estime avoir suffisamment fait cognoistre au livre precedent, que par l'Esprit general toutes choses sont, non seulement produites; ains corporifiees en l'univers: mais il reste à declarer quel corps prend cet esprit, & de quelle façon il se corporifie en corporifiant toutes les autres choses. Car il est necessaire que prenant de luy seul tous leurs corps, il soit luy mesme corporel, n'estant raisonnable de croire qu'il peust donner ce qu'il n'auroit jamais eu. Voyons donc de quel corps il se revest; & en quelle maniere il en est revestu: Non que ce soit toutesfois mon dessein de disputer icy de la corporification des choses celestes & surnaturelles, ains seulement d'attacher mon discours aux generations physiques, soubslunaires, & au corps de la terre qui est le vaisseau & propre matrice où ce premier & general corporifieur des choses, luy mesme se corporifie. Je dy donc qu'aucune corporification ne se peut faire sans moteur precedent, qui tire la puissance en action, afin que ce qui semble n'estre point, sorte en lumiere & parvienne au terme & accomplissement de l'intention de Nature; qui est tousjours de corporifier ce qu'elle veut produire.