Sal Lumen and Spiritus Mundi Philosophici

Par cela il apparoist que chacune chose & espece puise de l'ame du monde ses dons & vertus; non pas toutes entierement, mais bien celles de la semence, & autres conformes, par lesquelles elle germe & pullule. L'exemple s'en void & remarque en l'homme, qui se nourrissant seulement d'aliments humains, ne s'acquiert pas la nature des oyseaux ou poissons qu'il a mangez, mais bien l'humaine & convenable à son espece. Il advient aussi que quelquefois plusieurs autres animaux vivent des mesmes aliments & viandes, desquelles neantmoins chacun attire ce qui est propre à son espece. De sorte que c'est chose veritablement admirable, que d'une mesme viande l'homme tire ce qui est propre à l'homme; & l'oyseau & l'animal ce qui convient aux oyseaux & aux animaux. Or cela se fait, non pource que en une seule & mesme viande il y ait divers & variables aliments: mais à raison de l'espece qui est nourrie, laquelle attire & transforme en soy sa nourriture conforme, par le moyen dequoy elle engendre son semblable, à cause de la vertu de cette ame & raison seminale qu'elle a en soy, selon sa qualité.