Sal Lumen and Spiritus Mundi Philosophici

L'Ame du monde, & son action & vertu, est representee en toutes choses, dedans lesquelles elle est toute conforme. Elle lie, & conjoint ensemble les choses superieures & les inferieures. Car autant qu'il y a d'idees aux cieux, autant a elle de causes & raisons seminales, dont par le moyen de cet esprit, elle forge autant d'especes en la matiere. Partant, s'il advient quelquefois que chacune des especes degenere, l'ame qui est dedans pourra estre reformee & reduite en son premier estat par le moyen de cet esprit du monde qui luy est tresprochain, obeïssant à toute maniere de mouvement. Ne pensons toutesfois que cet intellect ideal soit attiré, mais bien l'ame douee des vertus d'iceluy, & allechee par les formes materielles. Ce qui ne doit sembler estrange, car elle mesme se fait la viande & l'apast, comme transmuable en toutes les choses par qui elle est attiree, & sollicitee; demeurant & residant tousjours volontairement en icelles. Zoroastre nomme ces congruitez & decences des formes avec les raisons de l'ame du monde, allechemens.