Sal Lumen and Spiritus Mundi Philosophici

Elle produit toutes choses qui ont vie, les conserve, les nourrit, puis finalement les resoult & transmue en elle mesme. Or estant agitee par les actions susdites, elle jette double expiration tant dehors que dedans elle: lesquelles expirations sortent de cet Esprit terrien, empreint & eschauffé par la chaleur celeste. De l'expiration qui s'esleve dehors d'icelle terre, advenant qu'elle soit humide, seront engendrees les bruïnes ou rosées: & si elle est seiche, elle produira les vents, foudres, & autres telles impressions seiches de l'air. Mais de celle qui demeure enclose & resserree en elle, advenant qu'elle soit humide, seront faites toutes choses liquefiables, comme metaux & mineraux. Et si au contraire elle est seiche & aride, elle en produira choses non fusibles, comme pierres & autres matieres semblables. Outre cela, toutes choses vegetables en proviennent, & reçoivent aliment de cet Esprit que la terre nourrit. C'est pourquoy les poëtes antiques nommoient cette terre grande ayeulle & nourrice de toutes choses.