Sal Lumen and Spiritus Mundi Philosophici

Je ne veux toutesfois donner cet avantage à ceux qui lisant ce chapitre pourroient faire par precipitation un mauvais jugement de moy, sur ce que je destraque l'intention principalle de Hermes du grand chemin Phisique pour la jetter au sentier que je tiens: sçachant bien que selon son precepte tous les bons Philosophes veulent que leur Soleil soit conjoint à leur Lune, pour faire par leur conjonction la generation necessaire. Car comme dit Arnauld de Villeneufve en sa fleur des fleurs, leur sperme ne se joint point à leur corps, sinon par le moyen de leur Lune, & cette Lune n'est point l'argent vulgaire, ains la vraye matiere de la pierre, qui assemble en son ventre, & retient inseparablement le corps, qui est le Soleil, & le sperme, qui est le Mercure. Et c'est de cette Lune qu'il parle en sa nouvelle lumiere, disant que horsmis le maistre qui luy enseigna l'œuvre, il n'avoit jamais veu personne travaillant sur la vraye matiere: mais que tous s'esgaroient & extravaguoient au choix des choses, comme si d'un chien ils vouloient engendrer un homme.