Sal Lumen and Spiritus Mundi Philosophici

Mais il faut que ceux qui auront desir de se confirmer en cette verité s'employent à lire les bons livres: car ce n'est pas mon dessein d'en parler icy davantage: parce que je pretens faire cognoistre seulement que le divin Hermes a d'un mesme doigt voulu toucher l'une & l'autre corde; ainsi qu'il le declare assez quand il dit qu'il est appellé Mercure trois fois grand, comme ayant les trois parts de la sapience de tout le monde: voulant dire qu'ayant anatomisé cet esprit general, qui est autheur materiel & principe des trois genres, qui font le tout de ce grand monde, il avoit la sapience & science universelle, par laquelle rien ne luy estoit plus incogneu. Apres avoir aussi dit dés le commencement; & comme toutes choses procederent d'un par la meditation d'un, ainsi toutes choses sont nees de cette chose unique par adaptation. Or cet un dont procederent toutes les choses, est l'Esprit general duquel je veux traicter: Et cette chose unique de laquelle il dit que seront perpetrez les miracles, est la vraye matiere mineralle de la pierre, de laquelle j'ay parlé cy dessus: qui est procreée par Nature dans la terre de cette premiere matiere generale: ou esprit universel: lequel esprit contenant en soy toutes les vertus celestes en puissance, en a communiqué à cette matiere mineralle autant qu'il estoit necessaire pour luy donner l'estre parfait auquel elle estoit destinee.