Sal Lumen and Spiritus Mundi Philosophici

L'Hortulan qui a commenté la table d'Hermes delaissant les radicaux principes de la nature, & descendant aux particuliers principes de l'Alchimie, entend par le Soleil, l'or philosophal, lequel il dit estre pere de la pierre: ce qui est vray. Car les illuminez en cet art, sçavent par experience, & l'ont appris de tous les bons autheurs (desquels le nombre est infiny) qu'en la vraye matiere & subject de la pierre sont en puissance or & argent, & vif argent en nature. Lesquels or & argent sont meilleurs que ceux que l'on voit & touche vulgairement, pource qu'ils sont vifs, & peuvent vegeter & croistre, & les vulgaires sont morts. Et s'il n'estoit ainsi, la matiere ne parviendroit jamais à la perfection extreme que l'art luy donne. Laquelle perfection est si grande qu'elle parfaict les imparfaicts metaux quasi miraculeusement, comme dit Hermes. Et toutesfois cet or & cet argent invisibles qui, par le magistere sont exaltez en si haut degré, ne sçauroient communiquer cette perfection aux imparfaits, sans le ministere de l'or & de l'argent vulgaires. C'est pourquoy les Maistres les y joignent à la fermentation: par ainsi l'or est tousjours pere de l'Elixir.