Sal Lumen and Spiritus Mundi Philosophici

Mais (me dira quelqu'un) puisque toutes choses procedent d'une mesme matiere, comment se peut il faire que le Soleil soit pere de la matiere, veu que d'icelle il a esté creé luy mesme? Pour respondre à cette question il faut entendre que si on regarde cette primeraine & prejacente matiere de toutes choses on la trouvera invisible, & qui ne peut estre comprise que par profonde & vive imagination: du Soleil & vital feu de laquelle, en elle naturellement inné, le Soleil celeste sortit & s'esleva plein de lumiere & de pareille vigueur ignee, qui desployant par apres cette chaleur interne & essentielle, accompagnee de cette chaleur naturelle, espart les rayons de son feu par toute la rondeur du monde; illuminant en haut les astres, & vivifiant toutes choses en bas. Or pource que la terre est comme la matrice commune de toutes choses, le Soleil agit principalement en elle comme au receptacle de toutes influences: au sein de laquelle sont cachees les semences de toutes choses, qui agitees & menees par la chaleur des rayons solaires sortent en lumiere.