Sal Lumen and Spiritus Mundi Philosophici

Et d'autres preparent certaines matieres, & les font putrifier, desquelles s'engendrent des animaux estranges, comme le Basilic d'un œuf de Coc, ou des menstrues d'une femme rousse: le Scorpion, de l'herbe ditte Basilic: des entrailles d'un bœuf la mouche à miel: des branches ou feuilles de certain arbre tombant en la mer, une espece d'oiseaux semblables à des canes: & tant d'autres choses à nous & à nostre monde incongneuës, plus dignes de admiration que de creance, pour estre hors du train commun de la nature, attirant la vie de cette vie universelle à certaines matieres, en certain temps & certain lieu: tant le monde est plein de vivacité preignante, & tousjours en action vitale. De sorte que rien ne meurt en luy, mais plustost que de demeurer sans agir, & par consequent sans vie, il refait incessamment d'une chose l'autre: & n'y a corps qui s'aneantisse ou perisse totalement. Car s'il estoit ainsi, toutes les parties du monde l'une apres l'autre, & peu à peu, s'esvanouyroient de nos yeux, voire mesme depuis tant de siecles, & tant de mutations, je ne sçay s'il y en auroit aujourd'huy quelque reste. A ce propos certain Poëte, non ignorant en cette secrette philosophie, parlant aux yeux de sa maistresse, leur dit, Vostre aspect inégal qui ma fortune change, Est comme le Soleil, contraire en ses effects, Qui amollit la cire, & endurcit la fange, Et fait des corps nouveaux de ceux qu'il a defaits.