Sal Lumen and Spiritus Mundi Philosophici

Les semences des plantes sont visibles jusques au grain: & celles des animaux jusques à la geniture. Les Metaux ont pareillement leur semence; mais elle ne peut estre veuë sinon des vrais Philosophes qui la sçavent extraire de son lieu propre avec grand Art: & la peut on beaucoup plustost conjecturer par raison, qu'apercevoir des yeux corporels. Que si dans les elemens n'estoit occultement contenue certaine vertu secrette produisante, en laquelle gist en puissance une faculté d'engendrer; plusieurs herbes ne sortiroient pas de terre, ny mesme des murailles plus eslevees, que jamais n'y ont esté semees ou plantees, & dont auparavant on n'avoit cognoissance. Et tant d'animaux divers ne seroient engendrez en la terre, & en l'eau, sans precedente copulation des sexes, qui toutefois croissent; & puis par commixtion de masle & de femelle produisent leurs semblables à la perpetuité de leurs especes; encor qu'ils ne soient engendrez par semblable assemblement de parens. Cela s'espreuve assez par la generation des anguilles, produittes du limon: & des mouches, ou bestions qu'on voit naistre des excremens des autres animaux. De quelle vie dira l'on que vivent les huistres, les esponges, & plusieurs choses aquatiques, lesquelles meritent mieux le nom de plantanimaux, que celuy de poissons? Or tous ces corps ne vivent point tant de vie qui leur soit proprement particuliere, que de celle de l'univers, qui est generalle & commune: Laquelle aparoist beaucoup plus vigoureuse sur la terre aux corps plus subtils, comme estans plus prochains de l'ame universelle du monde; qu'en ceux qui sont plus grossiers, ou plus esloignez d'elle.