Sal Lumen and Spiritus Mundi Philosophici

Or le mouvement (j'entens naturel) est tousjours accompagné de vie: comment donc produira en autruy & vie & mouvement, celuy qui n'a ny mouvement ny vie en soy? Le mouvement n'abandonne jamais ce que la vie n'a point encore abandonné: & ce qui est tousjours agité & mouvant ne peut estre estimé sans vie. L'ame de l'univers se mouvant de soy mesme, est source & origine de tout corporel mouvement, estant ordinaire compagne du corps; qui fait que la tresubtile partie de cette ame du monde cherchant le haut, & habitant en haut, d'un rouër continuel tourne avec les globes celestes, qu'elle conduit d'un mouvement propre & sans fin orbiculairement: & pour cette cause toutes choses superieures sont plus vitales, parfaites, & participantes de l'immortalité, que les autres inferieures: parce que ce qui est pourveu d'une vie non defaillante, doit necessairement estre agité d'un mouvement retournant à soy mesme. Et par ainsi, que ce qui est meu sans fin est consequemment doué de vie perpetuelle & indeterminable. Il paroist donc par ces raisons que le monde universel est universellement remply de vie. Tellement que la vie de chacune espece individue n'est sinon une vie participee de cette generalle vie du monde; qui seul peut veritablement estre dit animal. Aux elemens corporels duquel sont encloses les occultes semences de toutes les choses visibles & corporelles. Car nous voyons naistre plusieurs corps sans expresses semences precedentes; comme les plantes, & sans conjonction de masle & de femelle: Comme certains animaux engendrez de corruption.