Sal Lumen and Spiritus Mundi Philosophici

Sans lesquelles benedictions la vie n'est nullement vie, ains une odieuse langueur, comparable à quelque Mer tumultueuse que plusieurs vents contrairement soufflans renversent flot sur flots, engloutisse enfin nostre pauvre nef tourmentee au plus profond des tenebreux abismes de mort. Car nous avons dés le naistre pour ennemis intestins l'escadron des maladies, dont le nombre est presque infiny: puis par le dehors le bataillon maudit des incommoditez que l'inhumaine pauvreté conduit. Et ces deux adversaires venant à conspirer contre la vie, & pratiquer leurs secrettes intelligences, jugez un peu quelle deffence la pourroit preserver de leurs assauts. Outre lesquels nuysent encore les desdains & mutations de la fortune; contre laquelle l'Esprit humain (couvert des armes inexpugnables & invincibles de l'auguste Sapience) s'oppose virilement: De quelles loüanges donc sçauroit on assez dignement decorer celuy qui nous a premier revelé les principes & preceptes de la Philosophie? Mais plustost comment a peu l'Esprit humain penetrer si vivement jusques au cœur du monde & de la Nature par la recherche de telles merveilles? Celuy certainement qui premier fut regardé d'un si bon Astre qu'il sceut comprendre & pratiquer ces hauts & ocultes mysteres par une experience pleine de raisons, [Estoit] enfans d'un Dieu, ou quelque Dieu luy infuse.