Sal Lumen and Spiritus Mundi Philosophici

Donnant subject à beaucoup d'adjouster foy aux historiens qui tiennent que Hermes fut le beaupere de Moyse nommé Getro, & que divinement inspiré en toutes choses plus cachees, il luy apprit la caballe, & la Philosophie oculte à sa sœur Marie, dite la prophetisse, de laquelle il nous reste comme un tesmoing irreprochable certain fragment, que tous ceux qui ont escrit de la verité de cet Art, alleguent avec reverence. Il semble que la plus part nous vueillent encore asseurer que ce fut luy qui, apres le deluge, entrant en la vallee d'Ebron trouva les sept tables de marbre, esquelles avoient esté par les premiers sages insculpez les principes des sept arts liberaux, afin qu'ils ne perissent avec eux: & qu'en ayant seul une parfaitte intelligence, il les enseigna au peuple, & leur donna cette clairté qui nous esclaire encore à present. Le songe de Scipion, celuy de Poliphile, & le Lissias de Platon, nonobstant ce tiltre ont autant apporté de loüange à ces autheurs que tous leurs anciens escrits: & n'ont esté moins estimez de l'invention que de l'ouvrage. Considerant que pour dignement traitter de si hautes matieres il est bien necessaire que l'ame se desrobant de sa prison aille librement visiter les regions supremes, & conferer avec ses semblables: ce qu'elle ne pourroit faire ayant tousjours aux pieds l'importun contrepoids de cette masse terrestre, qu'elle secoue & quitte alors que le gracieux charme du sommeil aggravant le corps luy laisse les portes ouvertes.