Sal Lumen and Spiritus Mundi Philosophici

Mais plustost est il tres-necessaire d'entrer au corps du monde, & y prendre cette generalle vie qui ne defaut jamais; ains porte en elle mesme sa multiplication & dilatation, afin de la produire apres en nous, autant que les forces de nostre naturelle composition le pourront porter: car il ne faut pas estimer que par cela nous puissions devenir immortels; puisque tout ce qui porte masse corporelle en soy, c'est à dire excrement & corruption, ne se peut perpetuer: Et faudroit que nous feussions despouillez de tout corps auparavant que nous peussions arriver à ce tiltre: parce qu'apres ce despouillement nostre vie demeurant libre, ressemble veritablement à la vie universelle du grand monde, à laquelle se reunissant elle se resjouit en icelle comme en sa propre nature, suivant la reigle qui veut que tout retourne au lieu d'où il est party. Ce que Theophraste a voulu entendre par l'ame de ceux qui vivront au quint, c'est à dire, qui seront desliez de la masse composee des quatre elements, & vivront en un cinquiesme plus parfait que les quatre: secret que la seule intelligence embasmee de l'essentielle odeur de la Philosophie est capable de comprendre. Car ce quint element n'est pas une chose situee au dessus de la terre, de l'eau, de l'air, & du feu, comme ayant à la separation du Cahos monté plus haut qu'eux à cause d'une plus grande legereté: Mais c'est proprement un Esprit simple de soy, qui se mesle indifferemment par tout; qui nourrit & anime tout, & donne essence à toutes choses: estant neantmoins en son centre (c'est à dire, en sa propre nature) libre de toute corporeité, qui est le vray domicile de la mort. Car puisque la consistence luy provient des corps, il faut de necessité qu'avant cette consistence & specification il soit tres simple & purement spirituel, non meslé ny embrouillé dans la confusion des elements assemblez, & par consequent non subject à corruption & mortification: laquelle mortification aux corps n'est pourtant pas l'aneantissement de cest Esprit, mais seulement la separation & bannissement d'iceluy: pource que sentant le soufre corrompant qui maistrise tout le corps, s'emparer d'iceluy & l'occuper entierement, il est contraint d'abandonner la place, & s'en retourner d'où il est venu, assavoir au centre de cette grande sphere de vie, laissant les masses corporelles & excrementeuses à la terre d'où elles furent prises.