Sal Lumen and Spiritus Mundi Philosophici

Car comme en toutes creatures il n'y a rien de plus exquis ny desirable que la vie, qui donne sentiment, vegetation, & consistence à tout; aussi n'est il rien de plus riche & precieux que ce qui la peut entretenir & conserver outre l'aage commun. Or est il tout apparent que la vie est une chose celeste & divine: ce qui la peut entretenir doit donc estre de pareille nature; pource que toutes choses sont entretenues de cela mesme dont elles sont procedees. Mais encore veux je plustost dire que ce conservateur de vie est la vie mesme. Car l'estendue & prolongement d'icelle se fait par addition & refournissement, afin d'eviter le vuide ou defaillance en icelle. Les viandes que nous prenons ne nous servent que de cela, parce qu'elles participent de la vie de l'univers; & en contiennent en elles quelque particule, que le cuisinier de Nature en tire & exprime pour la joindre à la nostre. Mais parce que le peu qu'elles en ont est trop enveloppé de corruption excrementeuse, & n'est parfaitement fixe pour resister aux assauts de sa destruction, qui est ce feu contre nature, lequel sans cesse agist pour essayer à la bannir de nous avec l'humide radical, & l'enlever hors de son domicile, il seroit impossible à l'homme d'acquerir par les viandes seules cette longueur de vie. Parquoy c'est force de la tirer des corps plus purs: & la desvelopper encore de tout ce qui la pourroit infecter & empescher de produire en nous l'effect auquel le Ciel l'a destinee, qui est d'accroistre & vivifier la nostre.