Sal Lumen and Spiritus Mundi Philosophici

Or si la nature a bien eu le soing de cacher ces choses, de peur qu’elles fussent prostituees indifferemment à tous, & que les pourceaux vinssent fleurer la marjollaine, ou, comme l’on dit, fouiller au jardin ou croissent les roses: il ne se faut esmerveiller que les sages anciens & modernes se soient estudiez à ourdir tant de fabuleux voiles & figures enigmatiques pour les couvrir en les monstrant: car ils sçavoient bien que la ceremonieuse Nature ne veut point qu’on la voye nuë. Autrement elle n’eust jamais pris la peine de se masquer de tant de formes diverses & d’especes differentes, afin que par l’infinité de ces variables figures, ses venerables secrets fussent preservez du mespris ordinairement commun aux choses trop communes. C’est pourquoy j’en traitte encore icy avec mesme solemnité & retenue, pour ne tomber au peril de celuy qui divulga les secrets mysteres des Deesses Eleusines, qu’il n’est encore permis à nul des mortels d’esclaircir, parce qu’elles veulent tousjours demeurer secrettes & chastes, & non pas se voir abandonnees à l’usage public ainsi que courtisanes eshontees. Et si j’en parle dignement à mon tour, ceux qui sont advancez en l’inquisition de tels secrets le jugeront facilement, car l’experience est la vraye & irreprochable maistresse des choses.