Sal Lumen and Spiritus Mundi Philosophici

Je n’entends pas (comme j’ay desja dit) que le Lecteur de ce livre y pense trouver les Mines du Perou pour assouvir son avidité: bien qu’en plusieurs endroicts j’aye fait assez voir aux dessillez que je n’en ignore nullement les vrais chemins; quoy que je ne me sois encore peu resouldre d’entreprendre un si long voyage; pour certaines raisons conformes à celles qui empescherent le bon Trevisan par l’espace de deux ans apres qu’il en eut parfaite cognoissance par les livres. J’estalle donc seulement icy une drogue precieuse, ou plustost un tresor inestimable que la pieuse Nature nous donne pour l’entretien & prolongation de nostre vie; dont elle a receu de Dieu la charge & protection generale. Ce que je fais à la verité, porté d’un louable desir de servir au public de toute mon industrie; apres que l’Astre favorable de l’experience m’a conduit au port salutaire où je tasche d’adresser les curieux. Car j’ay quelquefois si heureusement traicté cet Esprit universel qu’avec une trespetite quantité j’ay soulagé cent personnes presque accablez de diverses infirmitez. Il n’y a nul doute qu’une infinité d’excellents esprits sont entrez fort avant en cette forest profonde & traversee d’obscurs sentiers; qui la voyant remplie de monstres espouventables se sont tellement estonnez que rebroussant chemin ils se sont divertis d’une si utile entreprise. Ainsi qu’avec un docte & ingenieux pinceau a mistiquement depeint le gentil Poliphile; le courage duquel toutefois n’ayant jamais fleschi sous toutes ces terreurs Paniques, luy a donné l’audace de franchir l’un & l’autre bord de cette forest noire: & surmontant tous obstacles l’a conduit sain & sauf au plaisant & desiré sejour de sa chere Polia, r’enclose au riche temple de Vesta.