Sal Lumen and Spiritus Mundi Philosophici

Or cette teincture accomplie & souverainement exaltee en nostre Mercure, il s’ensuit qu’il s’esleve au supresme degré de perfection: voire (à parler comme Hermes) qu’il monte au Ciel. Si qu’apres avoir enduré tous les tourments mortels, il a repris nouvelle vie. C’est à dire que luy ayant faict passer les tenebreux destroicts de la putrefaction, ensevely dans le sepulchre d’un vaisseau, il s’esleve neantmoins à la resurrection par le despouillement de toutes choses mortiferes & corrompantes; au moyen dequoy il a atteint le souverain degré d’excellence. Ce qui se faict en separant la terre du feu; le subtil de l’espais, & puis en fixant par chaleur graduee les parties ainsi depurees. Mais pour parler sans embage ny enigmes, cette montee au Ciel (qui est la sublimation & exaltation de ces parties elabourees à perfection) ne se feroit jamais si la separation & purification d’icelles n’avoit precedé, & donné lieu à la fixation qui est l’extreme & dernier but où l’art aspire. D’où nous remarquons qu’elle se fait pour deux fins principales: l’une pour perpetuer la teinture, l’autre pour separer & tirer du Mercure le soulfre volatil & bruslable qui est en son centre, & qui n’en voudroit partir s’il n’estoit importuné par la longue action du feu continuel, qui doit estre reiglé, de peur que la precipitation violente feist eslever dés le commencement le pur esprit du Mercure non encore affermi. Ce que le Comte de la Marche Trevisane a couvertement enseigné, disant: que le fuyant ne s’envole devant le poursuivant, & que le feu se face de mainte maniere comme il veut estre fait. C’est à dire que la partie spirituelle ne soit contraincte par ardeur intemperée d’abandonner la partie corporelle qui en fin la doit fixer par l’action de son soulfre interne aydé du feu exterieur & commun, discretement conduit par les degrez requis: où gist la principale industrie de l’operation.