Sal Lumen and Spiritus Mundi Philosophici

C’est le lieu où il se meut, tourne, & coule sans repos, dont Medée advertit Jason, luy disant: Voy le Dragon veillant, de fureur forcené, Qui d’escaille bruyante a le corps entourné: Dont le gosier sifflant fumee & feu desferre: Et qui par replis tors va baliant la terre De sa large poitrine, en la poudre imprimant Les sinueux sillons qu’il trace incessamment. J’ay bien voulu mettre en jeu ces deux considerations; non seulement pour faire voir quelle doit estre la recherche de ce Mercure, mais aussi pour verifier que ce qu’il contient de fixable en luy n’est autre chose que cette essence vivifiante, laquelle estant deuement fixee perpetue & conserve la vie en tous corps où elle entre, en dechassant par sa pureté les excrements; & parfaisant les choses imparfaites par sa perfection. Le but de la fixation tant naturelle qu’artificielle est la perpetuation & conservation, qui se font par le moyen de la teinture que le Mercure acquiert par cette fixation. Car la teinture est veritablement la vie: & la vie n’est autre chose que ce qui couvre, peint, & colore le corps de ce teinct qui le fait paroistre vital; & qui se perd & esteint à l’aborder de la mort. C’est pourquoy Nature a voulu que le sang où consiste la vie feust teint en rouge: & que plus il seroit pur, clair, & vif en rougeur, le corps parust & feust en effect plus sain, plus beau, plus dispost, & plus vigoureux. Comme au contraire estant par accident troublé, espaissi, & chargé de noirceur aduste, ou changé en faulses couleurs, le corps sentist & patist la rigueur du mal en l’interieur, & en donnast les tesmoignages au dehors par son descolorement. Nous remarquons le semblable aux vegetaux desquels la vigueur vitale aparoist en leur vive verdeur, de laquelle le changement denonce la decadence, & acheminement à leur mort. Le semblable est aux metaux, dont la perfection ou imperfection se discerne par leurs couleurs.