Sal Lumen and Spiritus Mundi Philosophici

Or je desire que l'artiste curieux considere icy deux choses: l'une de choisir par subtile imagination une Nature vivifiante & capable de conserver tous corps: L'autre d'eslire une chose qui se puisse de soy mesme vivifier & rengendrer. Et ne veux toutesfois entendre qu'il faille prendre deux choses ou matieres diverses & separees, assavoir l'une agente, & l'autre patiente, mais bien seulement une qui ayt les deux vertus ensemble de vivifier & d'estre vivifiee. Quant à la vivification active j'en ay desja suffisamment parlé: mais quant à la passive je dy qu'il faut que tout principe aye son origine en luy mesme, car s'il naissoit d'ailleurs il ne seroit plus principe. Et puisqu'il donne l'estre à toutes choses il est necessaire qu'en les engendrant il puise de luy mesme ce refournissement & perpetuelle plenitude: à cause dequoy il est en continuelle action & mouvement à vivification, qui l'empesche de mourir, parce qu'il n'est jamais delaissé de soy mesme, ayant son mouvement de luy & dedans luy. Ce que Macrobe a subtilement disputé sur le songe de Scipion s'attachant à l'ame de l'homme, combien que sa dispute se puisse encore mieux adapter à mon intention, la faisant servir pour l'ame ou Esprit du monde, qui est le subiect que je traicte.