Sal Lumen and Spiritus Mundi Philosophici

Et pour monstrer plus clairement par quelles voyes la Nature procede en ses operations, j'estime estre bien raisonnable de dire icy quelque chose des causes & manieres de fixation. Reprenant donc cet axiome indubitable allegué des le commencement de ce livre; qu'en l'ordre & constitution du monde est observee une reigle infaillible & perpetuelle, que tout ce qui a vie doit avoir quelque duree en icelle; & que rien n'est produit soubs le Ciel qui n'ait quelque espece de vie en soy, je diray que cette duree se fait par conservation, aspirante à une perpetuité. Car le but de la Nature est de vouloir perpetuer: estant le propre du bon autheur de vouloir tousjours conserver l'ouvrage de ses mains, jusques à ce qu'il soit arrivé au terme de la vieillesse; & que la lumiere de la vie s'esteigne par les froides bruines de la mort, aux pieds de laquelle il fait de necessité que toutes choses naissantes se prosternent, par cette inevitable loy imposee à tout ce qui prend commencement, de prendre fin. Que si les choses demeuroient en leur premier extreme, qui est le naistre ou le commencer, sans s'avancer au second, qui est le mourir ou le finir, tout resteroit en son Chaos, ou pour mieux dire rien ne consisteroit; & seroient les principes de tout subiect inutiles, voire destruicts d'eux mesmes. Pour eviter auquel inconvenient Nature a estably cet ordre & progression des choses, estant en continuelle action & motion, c'est à dire conservation & perpetuation. Or ce qui estend la vie, & mesme ce qui la conserve, ne peut estre sans quelque fixation & consistance durable contre les assauts de la destruction: Et cette essence conservatrice est en quelques especes plus fixe qu'és autres, à raison dequoy elles sont de plus longue & durable vie, comme plus difficiles à destruire ou mortifier: ainsi que le Cerf & le Corbeau entre les animaux: Le chesne entre les plantes: & l'Or entre les mineraux. Ce qui leur vient de la commixtion des elemens en eux plus egalle & plus digeste, en sorte que la mort, de qui le propre est de diviser & disjoindre, ne peut si facilement entrer en ces composez trop fermement liez & cimentez par une forte digestion. Et tant plus les corps sont pourveus de ces deux remedes, tant moins sont ils subiects aux accidens de mortelle corruption.