Sal Lumen and Spiritus Mundi Philosophici

Or comme Dieu a bien voulu enrichir les hommes des perfections de son fils, selon l'estendue de leur naturel: Et toutesfois n'a pas voulu que chacun d'eux estant souillé de vice allast chercher son remede & parfaict salut en son semblable, mais bien en celuy seul qui estoit le vray Occean duquel leur estoit decoulee cette perfection. Aussi Nature qui s'est tousjours rendue exacte observatrice des volontez de Dieu & imitatrice de ses operations, n'a point estably la parfaicte vertu de guarison & restauration aux herbes & creatures particulieres, mais a voulu qu'on la cherchast precisément au centre d'où elle leur est generallement communiquee, assavoir dans la terre, où cet Esprit vivifiant s'engendre: Car si les simples sont douez des vertus de guarir, restaurer, nourrir, & conserver, de combien en doit estre mieux pourveu celuy qui les leur depart, & duquel toutes choses les reçoivent? Or pour prouver que la terre est la tresoriere & dispensatrice de ces vertus, la seule experience journaliere suffit pour toutes raisons. Il faut bien qu'elle les possede toutes, car autrement elle ne les pourroit donner. C'est donc une chose digne d'admiration & d'estonnement que tant de grands personnages ayent consommé le temps de leurs estudes & pratiques à puiser l'eau des simples ruisseaux desja fort esloignez de la pure limpidité de leur source, comme ayant passé par l'impur limon des terres immondes & ne se sont avisez de courir droit à la propre fontaine. Non que je vueille despiser les medicaments speciaux, mais je voudrois que l'on cherchast le general, sans toutesfois delaisser les particuliers. Car jaçoit que celuy là suffise pour toutes guarisons, si est-ce que ceux cy sont encore louables pour mettre fin à certains maux exterieurs qui n'assaillent que la superficie, & non pas le centre de la santé. Retournant donc à mon but je diray derechef que la terre est la matrice en laquelle le Ciel a engendré cet Esprit nourrisseur, restaurateur, & conservateur des corps, duquel seul toute solidité & perfection de guarison peut & doit estre puisee. Or comment il faut trouver & prendre cet Esprit puissamment vertueux, tout homme prudent qu'un sincere desir portera à cette utile recherche, doit sur tout estre adverti de suivre incessamment le dessein tracé de la main divine, sur lequel Nature mesme se forme & guide: combien que Dieu excedant infiniment la Nature ne soit en façon quelconque attaché aux raisons naturelles, non plus qu'un souverain monarque aux loix qu'il auroit prescrittes, lesquelles toutesfois ses peuples observeroient sans demander pourquoy il les auroit ainsi establies. Mais qui a mieux ensuivy les traits de ce divin modele que le vieil Trismegiste, qui premier apres le deluge (selon le dire d'aucuns) ayant ouvert aux hommes les misteres de la parfaicte cognoissance de Dieu, a parfaictement touché ceux de la Nature?